Toiliú Reachtúil

I mí an Mheithimh 2018 , chuir Uisce Éireann iarratas pleanála faoi bhráid an Bhoird Pleanála do Thionscadal Draenála Mhórcheantar Bhaile Átha Cliath, mar aon le Tuarascáil Measúnachta Tionchair Timpeallachta agus Ráiteas Tionchair Natura. Rinneadh an t-iarratas faoi reachtaíocht pleanála a bhaineann le Forbairtí Bonneagair Straitéisigh. Cuireadh Ordú Ceannaigh Éigeantaigh faoi bhráid an Bhoird Pleanála lena dheimhniú. Tá an t-iarratas pleanála do Thionscadal Draenála Mhórcheantar Bhaile Átha Cliath ar fáil anseo. Ansin thionóil an Bord Pleanála comhairliúchán poiblí reachtúil lena n-áirítear éisteacht ó bhéal.

I Mí na Samhna 2019, thug an Bord Pleanála cead pleanála agus dheimhnigh sé an tOrdú Ceannaigh Éigeantaigh do Thionscadal Draenála Mhórcheantar Bhaile Átha Cliath. Cuireadh an cead pleanála seo ar neamhní tar éis imeachtaí dlí agus éisteacht Chúirte a bheith eisithe. Cuireadh an t-iarratas pleanála ar ais chuig an mBord Pleanála ina dhiaidh sin le hOrdú ón Ard-Chúirt ar an 16 Iúil 2021 le haghaidh cinneadh nua (an tIarratas Tarchur).

Tar éis iarraidh a fháil ón mBord, agus mar gheall ar an tréimhse ama a bhí caite ó rinneadh an t-iarratas bunaidh, chuir Uisce Éireann measúnuithe comhshaoil agus faisnéis nuashonraithe ar fáil don Bhord i mí Dheireadh Fómhair 2023 (an tAguisín). Bhí an tAguisín seo ina ábhar do chomhairliúchán poiblí idir Dé Máirt, an 7 Bealtaine 2024 agus Dé hAoine, an 7 Meitheamh 2024 inar iarradh ar pháirtithe leasmhara barúlacha a chur isteach maidir lena ábhar.

Is féidir an t-iarratas pleanála agus Faisnéis Bhreise, mar aon le hábhar eile ar Thionscadal Draenála Mhórcheantar Bhaile Átha Cliath a, a fheiceáil nó a íoslódáil ó www.gddapplication.ie.

Éilíonn gach sceitheadh fuíolluisce ó shaoráidí Uisce Éireann ceadúnas scaoilte fuíolluisce (CSF) ón nGníomhaireacht um Chaomhnú Comhshaoil (GCC). Tá an ceadúnas sin riachtanach chun a chinntiú go gcomhlíontar reachtaíocht na hÉireann agus an AE a rialaíonn diúscairt shábháilte fuíolluisce chóireáilte isteach sa chomhshaol. Tacaíonn sé sin le haidhmeanna Thionscadal Draenála Mhórcheantar Bhaile Átha Cliath maidir le sláinte an phobail agus an comhshaol a chosaint. Tá measúnú na Gníomhaireachta um Chaomhnú Comhshaoil ar an iarratas ar cheadúnas scaoilte fuíolluisce ar leithligh ón bpróiseas pleanála agus sa bhreis air.

Mar chuid de phróiseas toilithe foriomlán Thionscadal Draenála Mhórcheantar Bhaile Átha Cliath, rinne Uisce Éireann iarratas chuig an nGníomhaireacht um Chaomhnú Comhshaoil ar Cheadúnas Scaoilte Fuíolluisce don dobharcheantar beartaithe, Ceirtleán Bhaile Átha Cliath Thuaidh, a bhfreastalóidh an tionscadal air. Is príomhghné é seo a theastaíonn chun Tionscadal Draenála Mhórcheantar Bhaile Átha Cliath a sheachadadh. Cumhdófar leis an gCeadúnas Scaoilte Fuíolluisce seo sceitheadh eisiltigh chóireáilte ag an suíomh scaoilte beartaithe, 1 ciliméadar soir ó thuaidh ó Inis Mac Neasáin, mar aon le measúnú ar an líonra atá ann cheana, lena n-áirítear uisce stoirme agus forsceitheadh éigeandála.

I bhfianaise scála Thionscadal Draenála Mhórcheantar Bhaile Átha Cliath agus a dhobharcheantair shuntasaigh, tacaíonn Tuarascáil ar Mheasúnacht Tionchair Timpeallachta (TMTT) iomlán leis an iarratas ar cheadúnas scaoilte fuíolluisce. Tá gach doiciméad maidir leis an iarratas ar cheadúnas scaoilte fuíolluisce ar fáil ar shuíomh gréasáin na Gníomhaireachta um Chaomhnú Comhshaoil. Féadfaidh páirtithe leasmhara barúlacha nó aighneachtaí i scríbhinn maidir leis an iarratas ar an gCeadúnas Scaoilte Fuíolluisce nó an TMTT a ghabhann leis a chur faoi bhráid na Gníomhaireachta um Chaomhnú Comhshaoil trína suíomh gréasáin, nó ag a ceanncheathrú ag. Bosca Poist 3000, Eastát Chaisleán Bhaile Sheáin, Co. Loch Garman.