Bonneagar, Sócmhainní agus Soláthar Oibriúcháin

Riosca

Mura bhfreastalófar ar éileamh uisce reatha agus amach anseo i Mórcheantar Bhaile Átha Cliath, beidh éaradh mór ar sheirbhís uisce / caillteanas cóireáil uisce nó neamhábaltacht naisc nua a sholáthar.

Comhthéacs

Gan acmhainn bhreise a bheith ann, d’fhéadfadh dúshláin soláthair uisce, tionchair shóisialta agus eacnamaíocha, agus teip tacú le héilimh fáis sa todhchaí a bheith mar thoradh ar fhadhbanna cainníochta agus cáilíochta.

Is beag teacht aniar atá sa soláthar uisce i Mórcheantar Bhaile Átha Cliath. Fiú agus feabhas curtha ar éifeachtúlacht an líonra agus sceitheadh laghdaithe, is in olcas a rachaidh na deacrachtaí le soláthar uisce i Mórcheantar Bhaile Átha Cliath de bharr fhás an daonra, an fháis eacnamaíoch agus an athraithe aeráide. Go dtí go gcuirfear mórfhoinse nua uisce ar fáil, ní bheidh ar chumas Uisce Éireann seirbhís ar an gcaighdeán atá á lorg a bhaint amach agus beidh baol ann i gcónaí go dtarlóidh éaradh seirbhíse a mhairfidh i bhfad, rud a chuirfidh isteach go mór ar thithe agus ar ghnólachtaí.

Ábhar imní mhór maidir leis an Tionscadal Soláthair Uisce – Do Réigiún an Oirthir agus do Lár na Tíre (an réiteach straitéiseach fadtéarmach chun freastal ar riachtanais amach anseo) is ea go bhféadfadh sé go gcuirfí moill ar an bpróiseas um thoiliú reachtúil, cosúil le tionscadail eile um Sholáthar Bonneagair Straitéisigh lena n-áirítear Tionscadal Draenála Mhórcheantar Bhaile Átha Cliath.

Príomh-mhaoluithe

• Tá measúnú déanta sa Phlean Náisiúnta Acmhainní Uisce ar acmhainneacht agus ar cháilíocht uisce náisiúnta, díríonn sé ar chothromaíocht inbhuanaithe soláthair agus éilimh sa ghearrthéarma, sa mheántéarma agus san fhadtéarma.
• Tá an Tionscadal Soláthair Uisce – do Réigiún an Oirthir agus do Lár na Tíre aitheanta mar an tionscadal roghnaithe don réiteach straitéiseach fadtéarmach chun freastal ar éilimh i réigiún an Oirthir agus i Lár na Tíre amach anseo. Tá cead pleanála tugtha ag an Aire chun an tionscadal sin a chur faoi bhráid an Bhoird Pleanála in 2025.
• Tá príomhbhearta uasghrádaithe agus infheistíochta ar siúl agus molta chun teacht aniar a neartú, sceitheadh a laghdú, agus an riosca a bhainistiú go hoibríochtúil sa ghearrthéarma agus sa mheántéarma.
• Monatóireacht leanúnach á déanamh ar leibhéal gach acmhainn uisce (aibhneacha, lochanna, tollphoill, taiscumair gaibhnithe uisce) agus bearta gearrthéarmacha curtha ar fáil chun cur leis an méid uisce atá ar fáil le húsáid.

Riosca

An riosca nach mbainfí laghdú leordhóthanach ar ghlansceitheadh ​​amach.

Comhthéacs

Mura mbainfí amach an laghdú ar sceitheadh, tá seans ann go gcuirfí isteach ar chustaiméirí agus ar sheirbhísí, go gcuirfí le costais oibríochtúla agus go laghdófaí éifeachtúlachtaí agus go ndéanfaí dochar ar an gcaoi sin do sprioc straitéiseach Uisce Éireann bheith ina fhóntas iontaofa.

Príomh-mhaoluithe

• Tionscadal a chur i bhfeidhm lena gcuirtear fócas sonrach ar sceitheadh ​​i Mórcheantar Bhaile Átha Cliath chun tús áite a thabhairt do ghníomhaíochtaí gearrthéarmacha laghdaithe sceite chun an t-éileamh atá ag méadú a bhainistiú.
• Bunaíodh Ionad Barr Feabhais nua um Oibríochtaí Sceite.
• Tá príomhchláir i bhfeidhm, lena n-áirítear Clár ‘Aimsigh agus Deisigh’, Clár ‘An Chéad Dheisiúchán’, príomhphíobáin uisce nua á gcur isteach agus méadrú agus brú/líonra á mbainistiú.
• Tá Straitéis Sceite, Córas Bainistithe Sceite agus Plean Bliantúil Bainistithe Sceite curtha i bhfeidhm.

Riosca

Mura soláthrófar dóthain acmhainne ar fud na tíre chun; freastal ar riachtanais custaiméirí a bheidh ag ceangal amach anseo nó chun fhreastal ar fhás agus ar fhorbairt eacnamaíoch níos leithne, d’fhéadfadh tionchar a bheith aige sin ar chumas Uisce Éireann Beartas/Pleananna Rialtais a chur i gcrích.

Comhthéacs

Tá ról suntasach ag Uisce Éireann maidir le tacaíocht a thabhairt do spriocanna na hÉireann i dtaca le fás geilleagrach, comhlíonadh agus forbairt a bhaint amach. Mura n-éireoidh le hUisce Éireann dóthain acmhainneacht a sheachadadh, déanfaidh sé sin dochar dá chlú agus d’fhéadfadh go gcuirfí isteach ar fhás agus fhorbairt eacnamaíoch.

Príomh-mhaoluithe

• Plean Infheistíochta Caipitil Uisce Éireann a Sholáthar.
• Dul chun cinn príomhthionscadal bonneagair straitéisigh thábhachtaigh m.sh. Tionscadal Soláthair Uisce – do Réigiún an Oirthir agus do Lár naTíre agus Tionscadal Draenála Mhórcheantar Bhaile Átha Cliath.
• Uasghráduithe Sócmhainní MBÁC ar siúl. Plean maolaithe i bhfeidhm d’uasghráduithe breise caipitil chun athléimneacht MBÁC a fheabhsú.
• Oibreacha uasghrádaithe acmhainne ar siúl ag Ionad Cóireála Fuíolluisce na Rinne chun acmhainn laistigh de cheirtleán na Rinne a mhéadú.
• Bearta eatramhacha leanúnacha chun freastal ar éileamh ar uisce óil.

Riosca

Mura soláthrófar cóireáil fuíolluisce imleor nó bonneagar líonra gaolmhar is baolach go mbeidh tionchar suntasach ar an gcomhshaol, agus is baolach go sárófar ar an dlí.

Comhthéacs

Féadann drochbhail sócmhainní agus/nó deacrachtaí oibriúcháin chomh maith le moill ar oibreacha feabhsúcháin ríthábhachtaigh mar thoradh ar dhúshláin oibriúcháin agus thosca seachtracha (amhail dúshláin reachtúla nó phleanála nó dlí) cur le dochar don chomhshaol agus ionchúiseamh.

Sampla de sin is ea an mhoill ar chur i gcrích an phróisis reachtúil do Thionscadal Draenála Mhórcheantar Bhaile Átha Cliath atá ag dul i gcion go díreach ar an mbonneagar straitéiseach a sholáthar atá riachtanach lena chinntiú go leanfaidh Mórcheantar Bhaile Átha Cliath ag fás agus ag forbairt. D’fhéadfadh de thoradh ar athruithe ar chaighdeáin cháilíochta uisce, rialacháin chomhshaoil, agus ceanglais chomhlíontachta go ngearrfaí fíneálacha agus/nó go mbeadh dúshláin oibriúcháin I gceist.

Príomh-mhaoluithe

• Is príomhthionscadal é Tionscadal Draenála Mhórcheantar Bhaile Átha Cliath i dtaca le cóireáil fuíolluisce agus teacht aniar i Mórcheantar Bhaile Átha Cliath a chinntiú san fhadtéarma.
• Tá cláir cothabhála caipitil i bhfeidhm chun sócmhainní nua a chur in áit sócmhainní a bhfuil teipithe orthu nó atá ar tí teip a dhéanamh nó déanfar athchóiriú orthu chomh maith le caighdeáin seirbhísí a chothú mar atá faoi láthair.
• Cinntíonn fóraim ilréimsiúla go ndéantar tuairisciú maidir le fuíolluisce /go scaiptear teachtaireachtaí i ndáil le hionaid tosaíochta chuig an GCC agus chuig páirtithe leasmhara eile ar bhonn chomhsheasmhach.
• Oibreacha um acmhainneacht a uasghrádú ar siúl ag Ionad Cóireála Fuíolluisce na Rinne chun an cumas cóireála laistigh de cheirtleán na Rinne a mhéadú (coibhéis daonra 2.4 milliún).
• Tá tús curtha le Saoráid Stórála Bithsholaid Réigiúnach a thógáil.
• An Plean Náisiúnta um Bainistiú Sloda Fuíolluisce.
• Déantar sampláil agus anailís i gcomhréir le ceanglais reachtacha.
• Tá Pleananna Limistéar Draenála á bhforbairt i bpríomhcheirtleáin.
• Cur i ngníomh monatóireacht agus anailís fíor-ama ar ionaid lárnacha/ríthábhachtach a chun deacrachtaí a aithint.
• Teagmháil leanúnach le príomhpháirtithe leasmhara maidir le hathmhúnlú na Treorach maidir le Cóireáil Fuíolluisce Uirbigh.

Riosca

An riosca go dteipfeadh ar shócmhainn chriticiúil, rud a mbeadh cur isteach suntasach ar an tseirbhís mar thoradh air.

Comhthéacs

Tá Uisce Éireann ag feidhmiú le sócmhainní agus bonneagar aosaithe de thoradh ar thearc-infheistíocht stairiúil i líonraí uisce agus fuíolluisce agus saoráidí cóireála na hÉireann.

Mar gheall ar bhonneagar atá ag dul in aois, tá leochaileacht líonra ann i leith na drochaimsire, dúshláin maidir leis an slabhra soláthair, agus/nó dúshláin maidir le hacmhainní daonna.

Príomh-mhaoluithe

• Bainistíocht agus infheistíocht a dhéanamh i bpríomhshócmhainní lena n-áirítear an Plean Infheistíochta Caipitil lena dtugtar tús áite do réimsí infheistíochta chun díriú ar thosaíochtaí straitéiseacha ar aon dul leis an Ráiteas Beartais um Sheirbhísí Uisce agus leis an bPlean Straitéiseach um Sheirbhísí Uisce.
• Fócas leanúnach ar athléimneacht, ullmhacht éigeandála agus pleanáil leanúnachais gnó.
• Glacadh le cur chuige bainistithe sócmhainní ar aon dul leis an dea-chleachtas idirnáisiúnta.
• Creat Maoirseachta Sócmhainní tacaithe ag grúpaí maoirseachta láithreáin, réigiúnacha agus náisiúnta.
• Tuairisciú sócmhainní criticiúla.

Riosca

Riosca cibirionsaí a dhíríonn ar chórais a bhfuil tionchar acu ar ár mbonneagar agus ar sholáthar seirbhísí.

Comhthéacs

D’fhéadfadh cibirionsaí sláine sonraí a chur i mbaol, cur isteach ar ghnáthoibríochtaí, agus slándáil sholáthar uisce na hÉireann a chur i mbaol. D’fhéadfadh teagmhas dá leithéid bheith ina chúis le fadhbanna sláinte agus sábháilteachta poiblí, dochar do chlú, agus/nó fíneálacha féideartha.

Príomh-mhaoluithe

• Straitéis chun ár gcumas cibearshlándála a aibiú agus a threisiú chun athléimneacht Uisce Éireann in aghaidh cibirionsaí fhéideartha a fheabhsú.
• Ionad Oibríochtaí Slándála ag feidhmiú 24/7 a dhéanann monatóireacht ar shócmhainní Teicneolaíochta na Faisnéise agus Teicneolaíochta Oibriúcháin.
• Teagmháil leanúnach leis an Lárionad Náisiúnta Cibearshlándála chun aon bhagairtí a bhainistiú go réamhghníomhach.
• Monatóireacht leanúnach ar Chomhlíonadh na Treorach maidir le Slándáil Líonra agus Faisnéise.
• Plean Cibear-Athléimneachta agus Leabhar Reatha faoi athbhreithniú leanúnach agus cleachtaí ionsamhlúcháin déanta.
• Oiliúint ar líne ar an gcibearshlándáil le haghaidh fostaithe le cleachtaí ionsamhlaithe fioscaireachta rialta agus tionscnaimh eile chun fostaithe a choinneáil san airdeall agus ar an eolas faoi bhagairtí nua.

Riosca

An riosca go mbeadh turraing mhór ann de bharr cúrsaí seachtracha, (m.sh. adhaimsir mar gheall ar an athrú aeráide, bagairt paindéime domhanda, luaineacht gheopholaitiúil atá ag méadú, boilsciú, cur isteach ar an slabhra soláthair srl.), rud a mbeadh tionchar aige ar bhonneagar agus ar sholáthar seirbhísí.

Comhthéacs

D’fhéadfadh turraingí amhail tionchair mhaicreacnamaíocha a eascraíonn as luaineacht dhomhanda, paindéim dhomhanda, athruithe aeráide m.sh. méadú ar mhinicíocht tuilte/stoirmeacha, dúshláin slándála náisiúnta tionchar a imirt ar Uisce Éireann.

Príomh-mhaoluithe

• Tacaíonn samhlacha rialachais agus maoirseachta le teagmhais sheachtracha a d'fhéadfadh tionchar a imirt ar ghníomhaíochtaí soláthair gnó a bhraith go luath.
• Tá Bainistiú Éifeachtach Riosca agus Athléimneachta, lena n-áirítear bainistiú géarchéime, pleananna leanúnachais gnó agus pleanáil freagartha agus cásanna i bhfeidhm.
• Leantar ar aghaidh ag forbairt iarrachtaí ar son athléimneachta aeráide mar chuid lárnach dár ndearadh agus dár bpleanáil sócmhainní.
• Faire na Fáistine ar siúl go gníomhach.

Airgeadas

Riosca

Nach mbeadh samhail chuí um maoiniú ann, mar gheall ar easpa cinnteachta i ndáil le leithdháileadh maoinithe ilbhliantúil, nó cinneadh neamhleor maidir le liúntas rialaithe ioncaim, rud a rachadh i bhfeidhm ar ár mbonneagar agus ar sholáthar seirbhísí.

Comhthéacs

Formheasann an Coimisiún um Rialáil Fóntais (CRF) maoiniú caipitil agus oibriúcháin Uisce Éireann trí phróiseas ‘Rialaithe Ioncaim’. Tá cinneadh á dhéanamh ag CRF faoi láthair maidir le liúntais Oibríochtúla agus Chaipitil iomchuí don tréimhse 2025-2029.

Príomh-mhaoluithe

• Rannpháirtíocht chuimsitheach le páirtithe leasmhara (Ranna Rialtais agus Rialálaithe) chun leithdháileadh agus tacaíocht chuí maoinithe a chinntiú.
• Rialachas láidir inmheánach buiséid agus caiteachais.

Custaiméir, Daoine, Páirtithe Leasmhara agus Clú

Riosca

An riosca nach mbeidh acmhainní/cumas cuí ná leordhóthanach, tionscnaimh chultúir agus cumasóirí straitéiseacha i bhfeidhm ag Uisce Éireann a mbeadh tionchar acu ar bhonneagar agus ar sholáthar seirbhísí.

Comhthéacs

Tá Uisce Éireann ag dul faoi athrú eagraíochtúil a mhairfidh go dtí mí na Nollag 2026, i ndiaidh dóibh freagracht dhíreach a ghlacadh as seirbhísí uisce in 31 limistéar Údaráis Áitiúil. Chomh maith le haistriú seirbhísí oibríochtúla, tá Uisce Éireann ag leanúint air ag plé le baill foirne ó Údaráis Áitiúla d’fhonn iad a mhealladh isteach san eagraíocht.

Oibríonn Uisce Éireann i dtimpeallacht earcaíochta iomaíoch lena mbaineann ardleibhéil fostaíochta go náisiúnta agus dúshláin acmhainní i bpríomhréimsí ár ngnó a dteastaíonn sainchumais ina leith.

Tá sé ríthábhachtach a chinntiú go ndéanfaí cultúr Uisce Éireann a fhorbairt agus a choinneáil ar bun go héifeachtach le linn tréimhse ina bhfuil athrú suntasach ag tarlú chun go mbeidh rath ar an eagraíocht maidir le soláthar seirbhísí uisce agus beifear ábalta daoine a choinneáil agus a mhealladh, rud a laghdóidh an baol go mbeidh éagobhsaíocht eagraíochtúil ann.

Príomh-mhaoluithe

• Samhail Oibriúcháin Spriocanna a chomhlíonadh.
• Tá fóraim thiomnaithe líon daoine i bhfeidhm.
• Áirítear i Straitéis Daoine agus Sábháilteachta Uisce Éireann roinnt pleananna straitéiseacha atá dírithe ar fhostaithe, lena n-áirítear, ach gan a bheith teoranta do, Éagsúlacht, Cothromas agus Cuimsiú, Rannpháirtíocht agus Folláine, Sláinte Ceirde, agus Obair Chumaisc.
• Seoladh an tsraith nua luachanna agus iompair in 2024, mar chuid den chlár “Seasaimid go daingean ar son uisce”.
• Rianaítear Rannpháirtíocht inbhuanaithe Fostaithe agus tugtar faoi ghníomhaíochtaí forbartha ar leibhéal eagraíochtúil mar fhreagra ar shuirbhéanna agus aiseolas ó fhostaithe.

Riosca

An riosca go ndéanfaí damáiste do chlú Uisce Éireann agus/nó go gcaillfí muinín ann i gcás nach mbeidh Uisce Éireann ábalta freastal ar ionchais na bpáirtithe leasmhara mar gheall ar scála na hinfheistíochta a theastaíonn i gcomparáid leis an maoiniú atá ar fáil, mar aon le ceanglais maidir le beartas agus rialú atá ag méadú.

Comhthéacs

Is den ríthábhacht é go ndéanaimid ár ndícheall beart a dhéanamh de réir ár mbriathair dár gcustaiméirí agus dár bpáirtithe leasmhara agus go gcothóimid iontaoibh iontu le go dtacóidís linn ceal na tacaíochta sin, beidh sé deacair d’Uisce Éireann seirbhísí uisce a sholáthar agus spriocanna straitéiseacha na heagraíochta a bhaint amach.

Príomh-mhaoluithe

• Is tosaíocht ríthábhachtach dúinn é a bheith pras maidir leis an bpobal a choinneáil ar an eolas faoi gach ábhar a bhaineann le seirbhísí uisce, faoi shaincheisteanna a bhaineann le sláinte phoiblí go mór mór.
• Táthar tar éis Straitéis Chorparáideach nua a fhorbairt agus cuireadh i bhfeidhm é ar bhonn céimneach agus dírítear go mór inti ar Sheirbhís do Chustaiméirí, ar Phlé le Páirtithe Leasmhara agus ar Chlú.
• Tá plé le páirtithe leasmhara ag dul ar aghaidh go fóill sna fóraim is tábhachtaí.
• Pleananna agus próisis chuimsitheacha chumarsáide, lena n-áirítear comhairliúcháin phoiblí faoinár bpríomhthionscadail agus ár gcláir phobail ‘is scoileanna áitiúla.

Straitéis, Comhlíonadh agus Rialáil agus Dlí

Riosca

De thoradh ar mhainneachtain shuntasach cloí leis na Rialacháin um Uisce Óil agus uisce óil glan, sábháilte a sholáthar de réir na gcaighdeán riachtanach d’fhéadfadh riosca criticiúil do shláinte phoiblí do thomhaltóirí, a bheith i gceist mar aon leis an riosca ionchúisimh, an riosca go ndéanfaí sárú AE nó go mbeadh drochthioncair ar chlú.

Comhthéacs

Cé go leantar den obair ar fud bonneagair sócmhainne atá ag dul in aois chun méid agus cáilíocht an tsoláthair uisce óil a fheabhsú, tá baol ann i gcónaí go dtiocfaidh fadhbanna le cáilíocht an uisce chun cinn.

D’fheadfadh saincheisteanna teacht chun cinn de bharr adhaimsire nó dá gcuirfí moill ar oibreacha feabhsúcháin criticiúla (de bharr dúshláin oibriúcháin agus tosca seachtracha amhail saincheisteanna reachtúla nó pleanála, agóidí dlíthiúla agus athbhreithnithe breithiúnacha).

Príomh-mhaoluithe

• Bíonn ár Lárionad Náisiúnta um Bainistiú Oibríochtaí ag feidhmiú 24/7, agus monatóireacht á déanamh acu ar fheidhmíocht aláraim agus cóireála uisce ag na hionaid ríthábhachtacha cóireála uisce.
• Plean Infheistíochta Caipitil a bhaint amach chun sócmhainní a uasghrádú agus teacht aniar a fheabhsú.
• Oiliúint leanúnach ar fhoireann oibriúcháin ionaid maidir le hoibríochtaí ionaid agus teagmhais a thuairisciú.
• Cinntíonn fóraim ilréimsiúla go ndéantar tuairisciú agus teachtaireachtaí comhsheasmhacha maidir le fuíolluisce/ maidir le hionaid chóireála tosaíochta a sheoladh chuig an nGníomhaireacht um Chaomhnú Comhshaoil agus páirtithe leasmhara eile.
• Déantar sampláil agus anailís i gcomhréir le ceanglais reachtacha.
• Tá plé tras-eagraíochtúil ar siúl maidir le comhlíontacht Rialála Uisce Óil a chur i bhfeidhm.
• Sainghrúpaí Forfheidhmithe um Uisce óil – inmheánach agus seachtrach
• Tá foireann, próisis, nósanna imeachta agus córas á fhorbairt de réir an Phlean Náisiúnta Sábháilteachta um Uisce Óil.

Riosca

Mura mbaintear amach gach uile thoradh lena rabhthas ag súil sa Chlár um Athrú Chun Feabhais de chuid Uisce Éireann, cuirfear isteach ar ár mbonneagar agus ar sholáthar seirbhísí.

Comhthéacs

Is ar Uisce Éireann anois, atá an fhreagracht dhíreach as seirbhísí uisce sna 31 cheantar Údarás Áitiúil. Ciallaíonn aistriú freagrachta oibriúcháin, go bhfuil Uisce Éireann go hiomlán cuntasach as soláthar Seirbhísí Uisce sna limistéir údaráis áitiúil seo chomh maith le bainistiú agus treorú riachtanach fhoireann uile na Seirbhísí Uisce, lena n-áirítear iad siúd atá fós fostaithe ag an Údarás Áitiúil, agus é freagrach go díreach freisin as comhlíonadh rialála agus reachtaíochta.

Príomh-mhaoluithe

• Struchtúr eagraíochta a fhorbairt don todhchaí lena léireofar na cumais riachtanacha d’Uisce Éireann amach anseo.
• Rialachas láidir tionscadail i bhfeidhm.
• Tá Ionaid Barr Feabhas bunaithe trí Chlár um Athrú chun Feabhais Uisce Éireann.
• Mar aon le haistriú na seirbhísí oibríochtúla, tá rannpháirtíocht leanúnach ag dul ar aghaidh le foireann na nÚdarás Áitiúil chun a oiread agus is féidir a spreagadh chun dul isteach inár n-eagraíocht chomhroinnte nua fad is atá dul chun cinn á dhéanamh san earcaíocht d’fholúntais chriticiúla.