Réamhrá

Tá an inbhuanaitheacht i gcroílár ghníomhaíochtaí agus oibríochtaí Uisce Éireann. Táimid bródúil as ár gcomhshaol a fheabhsú agus as cur ar chumas na bpobal dul chun cinn a dhéanamh trí na seirbhísí a chuirimid ar fáil.

Tá ceithre cholún lenár straitéis inbhuanaitheachta:Comhshaol, Sóisialta, Rialachas agus Comhoibriú inmheánach agus seachtrach, rud a aithnímid atá ríthábhachtach chun torthaí inbhuanaithe tábhachtacha a sheachadadh.

Tá dul chun cinn suntasach déanta againn in 2024, chuireamar lenár straitéis Inbhuanaitheachta, bhaineamar amach an Marc Oibriú Freagrach Gnó, chuireamar tús le nó rinneamar nuashonrú ar chaighdeáin deartha agus sonraíochtaí feidhmiúla a bhaineann le hinbhuanaitheacht d’fhonn inbhuanaitheacht a leabú inár n-oibríochtaí agus inár ngníomhaíochtaí laethúla. Tá ár struchtúr rialachais trasfheidhmeach; a tugadh isteach in 2023 chun athbhreithniú a dhéanamh ar chinnteoireacht a bhaineann le hinbhuanaitheacht, lánfheidhmeach agus tá fíorthionchar aige maidir le tuiscint eagraíochtúil ar thopaicí ábhartha Comhshaoil, Sóisialta agus Rialachais (ESG). Táimid dírithe, ní hamháin ar sheachadadh don lá atá inniu ann, ach freisin do na glúnta atá le teacht.

Straitéis Inbhuanaitheachta

In Uisce Éireann, táimid tiomanta d’inbhuanaitheacht sheirbhísí uisce na hÉireann a fheabhsú, agus ár gcion a dhéanamh chun todhchaí níos inbhuanaithe a thógáil. Tugadh ár Straitéis Inbhuanaitheachta chun críche in 2024 agus tá sé beartaithe againn í a fhoilsiú le linn 2025. Leagtar amach ann na sé phríomhréimse a bhfuil sé beartaithe againn ár n-iarrachtaí a dhíriú orthu chun dul chun cinn fiúntach a dhéanamh maidir le hinbhuanaitheacht a leabú in oibríochtaí agus i ngníomhaíochtaí laethúla. Ina measc seo, tá uaillmhianta a bhaineann le Carbón - Glan-Nialasach, Bithéagsúlacht, Bainistiú Acmhainní Uisce, Geilleagar Ciorclach, Éagsúlacht, Cothromas agus Cuimsiú, agus oideachas a chur ar ár bpobail faoi luach an uisce. In 2025, cuirfidh Uisce Éireann tús le monatóireacht agus tuairisciú ar fheidhmíocht le hais na n-uaillmhianta sin.

Tá sé mar aidhm inár straitéis inbhuanaitheachta an inbhuanaitheacht a thabhairt chun tosaigh i gcinnteoireacht, ár n-uaillmhianta agus ár dtionscnaimh inbhuanaitheachta a leabú agus monatóireacht a dhéanamh orthu ar fud Uisce Éireann.

Gnó ag Obair go Freagrach

In 2024, bronnadh creidiúnú foirmiúil ar Uisce Éireann le “Marc Gnó ag Obair go Freagrach” de chuid Gnó sa Phobal Éireann (BITCI), caighdeán Eacnamaíoch, Comhshaoil, Sóisialta agus Rialachais na hÉireann. Agus é fíoraithe go neamhspleách ag an Údarás um Chaighdeáin Náisiúnta na hÉireann, is é an caighdeán inbhuanaitheachta a chothaíonn cultúr gnó freagrach trí fheabhas leanúnach, trí chuntasacht leanúnach, agus trí cheannaireacht agus mar sin is pointe tábhachtach agus ríthábhachtach é in aistear Uisce Éireann a bheith ina eiseamláir inbhuanaitheachta.

De réir mar a leanfaidh Uisce Éireann ar aghaidh ag tabhairt tús áite don inbhuanaitheacht i bpróiseas na cinnteoireachta bainteach le seachadadh seirbhísí uisce bunathraithe, féadtar a rá gur garsprioc thábhachtach é an vóta muiníne poiblí seo (atá fíoraithe go neamhspleách), agus féadtar a rá gur aitheantas é dár n-iarrachtaí inbhuanaitheachta,

Comhshaol

Nóta: Sonraí tagartha arna bhfoilsiú ag Údarás Fuinnimh Inmharthana na hÉireann (SEAI) i dtuarascáil bhliantúil ar fheidhmíocht fuinnimh na hearnála poiblí (sonraí 2022). Táimid ag súil go bhfoilseoidh an ÚFIÉ sonraí fíoraithe 2023 agus 2024 le linn na bliana 2025.

Athrú Aeráide

Tá sé tábhachtach anois agus beidh sé níos tábhachtaí d’Uisce Éireann tionchair agus rioscaí an athraithe aeráide a bhainistiú. Ós rud é go bhféadfadh bagairtí athraithe aeráide cur isteach ar athléimneacht ár seirbhísí uisce, ní mór d’Uisce Éireann tosaíocht a thabhairt d’iarrachtaí inbhuanaitheachta chun cabhrú leis na teagmhais seo a mhaolú agus a bhainistiú. Ba cheart dúinn machnamh a dhéanamh freisin ar an tionchar dearfach a d’fhéadfadh a bheith againn ar ár n-éiceachórais nádúrtha, ar na pobail a ndéanaimid fearastal orthu, agus ar an slabhra soláthair níos leithne trí athrú a thionscnamh agus a chur i bhfeidhm.

Oiriúnú Aeráide

Leanfaimid de ghníomhaíochtaí oiriúnaithe aeráide a chomhtháthú lenár ngníomhaíochtaí agus inár bpleananna bonneagair. Is leis an bPlean Náisiúnta Acmhainní Uisce (PNAU), ár bplean 25 bliain, a aithneofar conas mar a gcuirfimid soláthar uisce atá sábháilte, inbhuanaithe, slán agus iontaofa ar fáil dár gcustaiméirí agus dár bpobail, agus an comhshaol á chosaint ag an am céanna. Leis an bplean seo ligtear dúinn tionchair ionchasacha um an athrú aeráide a chomhtháthú le pleanáil agus feidhmiú ár mbonn sócmhainní soláthair reatha agus amach anseo.

Cabhróidh forbairt Réitigh atá Bunaithe ar an Dúlra, lena n-áirítear Bogaigh Tógtha Comhtháite agus Leapacha Giolcaí do Thriomú Sloda, le hathléimneacht aeráide a thabhairt san áireamh inár mbonn sócmhainní. Tá ár n-oibreacha bonneagair chaipitil á ndearadh le haghaidh athléimneacht aeráide, lena n-áirítear samhaltú aeráide uirbigh, pleanáil um chosaint tuilte, bainistiú uisce stoirme agus feabhsuithe ar an ngréasán séarachais. Tugtar san áireamh lenár mbainistíocht oibriúcháin, an phleanáil leanúnachais chun aghaidh a thabhairt ar thionchar líon na stoirmeacha agus na dtuilte atá ag dul i méid agus in olcas.

Glan-Nialasacht

In Uisce Éireann, táimid tiomanta do ghníomhartha bríocha a ghlacadh chun glan-nialasacht a bhaint amach de réir spriocanna aeráide an rialtais. Mar cheann de na heagraíochtaí earnála poiblí is mó sa tír a ídíonn fuinneamh, aithnímid scála an dúshláin a bhaineann le hathrú ó bhonn a dhéanamh go bhfóntas náisiúnta a ailíníonn agus a thacaíonn lenár bhfís agus lenár gcuspóirí straitéiseacha, agus a thabharfaidh cosaint don chomhshaol chomh maith leis an comhshaol sin a bhfuil ár seirbhísí ag brath air a fheabhsú. Is é an pointe tosaigh ar ár dturas glan-nialasachta ná raon feidhme na n-astaíochtaí gás ceaptha teasa (GCT) reatha a thuiscint ar dtús, lena n-áirítear tomhas cuimsitheach ar ár n-astaíochtaí raon feidhme 1, 2, agus 3 de réir an Phrótacail GCT.

Táimid fós tiomanta do spriocanna na hearnála poiblí atá sa Phlean Gníomhaíochta Náisiúnta um an Aeráid a bhaint amach, chun an sprioc iomlán maidir le laghdú astuithe GCT 51% a bhaineann le dearbh-fhuinneamh a bhaint amach faoin mbliain 2030.

Astuithe Gáis Cheaptha Teasa (GCT).

Scóip Astaíochta GCT 1, 2, 3

Tá cur chuige Uisce Éireann maidir lenár n-astaíochtaí GCT Scóip 1 agus 2 agus roinnt astuithe Scóip 3 a ríomh bunaithe ar leabhar oibre agus modheolaíocht chaighdeánaithe chuntasaíochta carbóin, arna fhorbairt ag UK Water Industry Research Limited chun astuithe gáis cheaptha teasa oibriúcháin sa Tionscal Uisce a chainníochtú.

Tagraíonn ár n-astuithe GCT Scóip 1 d'astuithe díreacha a thagann ó fhoinsí atá faoi úinéireacht nó faoi rialú Uisce Éireann. In 2025, beidh sé riachtanach ár gcórais mhonatóireachta agus cleachtais nuálacha a nuashonrú chun dul i ngleic lenár n-astaíochtaí próisis a bheidh mar bhonn lenár bpleananna aistrithe aeráide mar phríomhfhócas chun na hastaíochtaí GCT seo a laghdú.

Tagraíonn astuithe GCT Scóip 2 d'astaíochtaí indíreacha ó ídiú an leictreachais ceannaithe. Tá ár n-astuithe bunaithe ar shonraí ídiú leictreachais arna bhfíorú ag Údarás Fuinnimh Inmharthana na hÉireann (ÚFIÉ) a fhoilsítear go bliantúil.

Maidir le hastuithe GCT Scóip 3, tá measúnú déanta ag Uisce Éireann ar na hastuithe GCT a bhaineann le húsáid ceimiceán (Catagóir 3.1) agus tarchur agus dáileadh leictreachais (Catagóir 3.3). Ina theannta sin, chuireamar san áireamh anailís ardleibhéil phríomhionad carbóin bunaithe ar chaiteachas soláthair chun tionchar ár slabhra soláthair ar astuithe Scóip 3 a aithint.

Mar a léirítear thíos, is ionann Raon 1 agus 22.5% de lorg GCT margadh-bhunaithe Uisce Éireann, agus is ionann Scóip 2 agus 26.5%. Laistigh de Raon 1, cuireann astuithe ó chóireáil fuíolluisce le 21% dár n-astuithe iomlána GCT. Tagann an 51% eile dár lorg faoi astaíochtaí príomhionad Scóip 3.

	tCO2	% de atá Bunaithe ar an Margadh
Scóip 1 Painéal Idir-Rialtasach ar Athrú Aeráide (IPCC) Iomlán	210,048	22.5%
Breoslaí Iontaise	14,770
Próiseas agus Éalaitheach	181,865
Astuithe éalaitheacha	1,434
Astaíochtaí ó dhíleá	7,189
Iompar	4,790
Scóip 2 (Bunaithe ar Shuíomh)	173,212
Scóip 2 (Bunaithe ar an Margadh)	247,660	26.5%
Scóip 3 (Príomhionad)	477,617	51%
Go hIomlán Bunaithe ar Shuíomh*	860,877.4
Go hIomlán Bunaithe ar an Margadh	935,325.5	100%

* Úsáideann figiúirí bunaithe ar shuíomh na meánastaíochtaí eangaí chun astuithe leictreachais a ríomh.

** Úsáideann figiúirí bunaithe ar an margadh fachtóirí astaíochta a bhaineann go sonrach leis an leictreachas iarbhír a ceannaíodh.

Fuinneamh agus Éifeachtúlacht Fuinnimh

Tá sainordú ag Uisce Éireann, tríd an bPlean Gníomhaíochta Náisiúnta um Aeráid, a éifeachtúlacht fuinnimh a fheabhsú 50% faoin mbliain 2030 le hais thagarmharc 2009 (coigeartaithe don daonra a ndéantar freastal air). Tomhaiseann an táscaire feidhmíochta fuinnimh (EnPI) feidhmíocht fuinnimh trí ídiú phríomhfhuinnimh iomlán na heagraíochta a roinnt ar mhéadrach gníomhaíochta, i gcás Uisce Éireann, is é an méadrach ná an daonra a ndéantar freastal air. Gach bliain cuirimid ár sonraí tomhaltais fuinnimh faoi bhráid Údarás Fuinnimh Inmharthana na hÉireann (ÚFIÉ) a dheimhníonn agus a fhoilsíonn ár bhfeidhmíocht éifeachtúlachta fuinnimh nuashonraithe. In 2024, cuireadh bearta breise i bhfeidhm agus sinn fós tiomanta do sprioc 2030 a bhaint amach.

Fuinneamh In-athnuaite

Chun ár n-uaillmhian Glan-Nialais a bhaint amach, is cumasóir ríthábhachtach é a chinntiú go bhfuil soláthar dóthanach de ghiniúint fuinnimh in-athnuaite ann. Tá ról ríthábhachtach ag bithghás agus is é ár bpríomhfhoinse fuinnimh in-athnuaite ar an láthair é agus cuireann sé go mór le baint amach ár n-uaillmhianta fuinnimh in-athnuaite. Gintear bithghás ónár ngléasraí um dhíleá anaeróbach sloda fuíolluisce agus laghdaítear ár spleáchas ar bhreoslaí iontaise. In 2023, tháirgeamar timpeall 100MWh de Bhithghás thar 10 suíomh agus don bhliain 2024, táimid ag súil le leibhéal táirgthe ar aon dul leis sin. Le linn na bliana 2024, faomhadh maoiniú do Chéim 1 de Chlár nua um Barrfheabhsú Bithgháis. Is é aidhm an chláir seo measúnú agus barrfheabhsú a dhéanamh ar tháirgeadh bithgháis agus úsáid an bhithgháis a ghintear inár saoráidí díleáite anaeróbaí chun acmhainneacht na hacmhainne straitéisí seo a uasmhéadú.

Chomh maith le bithghás, leanaimid orainn ag leathnú ár gclár fótavoltach gréine (PV) mar fhoinse fuinnimh in-athnuaite comhlántach.

Uisce

Is féidir le hUisce Éireann tionchar dearfach a imirt ar sholáthar uisce atá sábháilte, slán agus iontaofa a chur ar fáil dár gcustaiméirí agus dár bpobail trí chothromú a dhéanamh ar sholáthar agus éileamh ar uisce óil sa ghearrthéarma, sa mheántéarma agus san fhadtéarma. Is éard atá i gceist chun an cothromú sin a bhaint amach ná níos lú a úsáid, níos lú a chailleadh agus soláthar níos cliste a dhéanamh, mar atá leagtha amach sa Phlean Náisiúnta um Acmhainní Uisce. Ceann de na príomhthosaíochtaí atá ag Uisce Éireann go fóill is ea dul i ngleic le sceitheadh agus sceitheadh a laghdú. Tá sé mar aidhm againn sceitheadh a laghdú go dtí faoi bhun 20% faoin mbliain 2030 ar fud Mhórcheantar Bhaile Átha Cliath agus faoin mbliain 2034 go náisiúnta.

Gradam Gnóthachtála Fuinnimh Gnó

In 2024, bronnadh ‘An Gnóthachtáil Fuinnimh is Fearr san Earnáil Phoiblí’ orainn as ár gcuid oibre i soláthar seirbhísí uisce inbhuanaithe d’Éirinn.

An Bhithéagsúlacht

Braitheann cumas Uisce Éireann seirbhísí inbhuanaithe uisce agus fuíolluisce a sholáthar go mór ar thimpeallacht nádúrtha a fheidhmíonn go cuí. In Uisce Éireann tá cur chuige Bithéagsúlachta ‘gan glanchaillteanas’ á fheidhmiú againn do thionscadail nua agus tá sé beartaithe againn é seo a chur ar aghaidh go Glanghnóthachan Bithéagsúlachta thar gach tionscadal nua faoin mbliain 2030.

Aithnímid an gá atá le hiarrachtaí a mhéadú agus a luathú chun deireadh a chur le meath na bithéagsúlachta, tacaímid leo, agus táimid tiomanta lena chinntiú go ndéanaimid bonneagar a thógáil agus a bhainistiú go freagrach ionas go gcosnófar ár n-éiceachórais agus nuair is féidir, iad a fheabhsú. Tá buntáistí na bithéagsúlachta soiléir nuair a bhaineann sé le cáilíocht ár bhfoinsí uisce óil a chosaint agus réitigh nádúr-bhunaithe a chur san áireamh.

Is taca leanúnach dúinn é ár bPlean Gníomhaíochta Bithéagsúlachta chun an comhshaol nádúrtha a chaomhnú, a fheabhsú agus chun oibriú leis. Cuirtear ar fáil sa phlean na huirlisí chun gach láithreán a bhainistiú ar bhealaí a rachaidh chun tairbhe na bithéagsúlachta. Is leis an bplean a dhíreofar bearta feabhsúcháin a bheidh in oiriúint do gach láithreán ar leith. Tá Uisce Éireann ag cur níos mó ‘réitigh nádúr-bunaithe’ chun cinn go gníomhach inár bpleananna agus inár dtionscadail chun tionchar a sheachaint agus chun leas na bithéagsúlachta ar nós Bogaigh Tógtha Comhtháite, Leapacha Giolcach um Thriomú Sloda, Bogaigh Uisce Stoirme, Córais Inbhuanaithe Draenála Uirbeach (SUDanna), Scagairí Snasaithe Giolcach agus Féarach.

Cás-Staidéar

In Uisce Éireann, bímid de shíor ag lorg bealaí chun luach a chur ar ár dtimpeallacht nádúrtha agus é a fheabhsú agus chun bithéagsúlacht a chur chun cinn. Tá Uisce Éireann ina chomhpháirtí sa Phlean Uile-Éireann um Pailneoirí agus cuireann sé gníomhartha an Phlean i bhfeidhm ar gach láithreán de chuid Uisce Éireann. Is éard atá i gceist leis seo bearta soiléire a leagan síos chun tacú lenár ndaonra pailneoirí ar láithreáin Uisce Éireann agus iad a mhéadú chun bithéagsúlacht a chur chun cinn.

A bhainistiú don ‘Bhumbóg Bhuí Mhór’ le beach ar bhláth; lógó Phlean Uile-Éireann um Pailneoirí.

Grianghraf gar-amhairc de bheach ar phlanda glas chun tosaigh. Tá an cúlra as fócas.

Tá bearta feabhsaithe bithéagsúlachta uile Uisce Éireann báúil do phailneoirí agus tá siad ag teacht leis an bPlean Uile-Éireann um Pailneoirí. Léirítear sampla iontach de na buntáistí a bhaineann le bainistiú ár bhféarthailte ar an mbealach seo ag ár láithreán i mBéal an Mhuirthead, Maigh Eo, áit a bhfuil bainistíocht an láithreáin ag tacú leis an mBumbóg Bhuí Mhór i gcomhar le Tionscadal Comhpháirtíochta Nuálaíochta na hEorpa um Bumbóg Bhuí Mhór agus Bailte Slachtmhara Bhéal an Mhuirthead, Contae Mhaigh Eo. Fuarthas an Bhumbóg Bhuí Mhór ar fud na hÉireann tráth ach tá sé teoranta anois do líon beag láithreacha feadh chósta an iarthair agus tá sé i mbaol in Éirinn. Bhí sé mar aidhm ag an tionscadal seo feabhas a chur ar fhlúirse bláthanna dúchasacha ar thailte leithinis an Mhuirthead agus mórthír chósta Iorrais chun bia ríthábhachtach agus áiteanna neadaithe a sholáthar do bheacha.

3 dhuine i mbun comhrá am lóin i suíomh ceaintín oifige.

Sóisialta

Ár nDaoine

Déanaimid tionchair ár ngnó ar fhostaithe, ar chustaiméirí agus ar phobail, a bhainistiú agus a shainaithint go réamhghníomhach. Táimid tiomanta do chinntiú go bhfágtar tionchar dearfach, fiúntach inár ndiaidh sna pobail ina n-oibrímid.Lean Uisce Éireann de thacaíocht a thabhairt do chomhpháirtíochtaí láidre agus do chláir phobail. Cuireann na cláir sin iompar dearfach chun cinn i dtaca le gníomhaíochtaí a bhaineann le huisce agus fuíolluisce i dtithe agus i ngnólachtaí, agus méadaíonn siad feasacht ar cheisteanna a bhaineann le huisce agus na tairbhí a bhaineann le hathruithe simplí dearfacha a dhéanamh.

Tús Áite á Tabhairt don tSábháilteacht

Tá Uisce Éireann tiomanta do chultúr na sábháilteachta a fheabhsú tríd an gcreat agus tionscnaimh Obair Shábháilte Baile Sábháilte, a dearadh chun a chinntiú go bhfuil an chumhacht ag an bhfoireann agus ag comhpháirtithe seachadta tosaíocht a thabhairt do bhealaí sábháilte oibre.

In ainneoin na béime leanúnaí ar shábháilteacht, meabhraítear dúinn go mbaineann riosca lenár ngníomhaíochtaí lena bhféadfaí dochar a dhéanamh i gcónaí. Go tragóideach ar an 29 Bealtaine 2024, bhain timpiste mharfach do dhuine a bhí ag obair ar son duine dár gcomhpháirtithe seachadta tríú páirtí le linn oibreacha ag Ionad Cóireála Fuíolluisce Ros Cré. Tá an eachtra á fhiosrú faoi láthair leis an Údarás Sláinte agus Sábháilteachta.

Tá Uisce Éireann tiomanta do chultúr na sábháilteachta a fheabhsú tríd an gcreat agus tionscnaimh Obair Shábháilte Baile Sábháilte, a dearadh chun a chinntiú go bhfuil an chumhacht ag an bhfoireann agus ag comhpháirtithe seachadta tosaíocht a thabhairt do bhealaí sábháilte oibre.

Cheadaigh an Bord an plean straitéiseach trí bliana Obair Shábháilte, Baile Sábháilte in 2023 agus tá sé i mbliain a haon dá chur i bhfeidhm. Aithníonn an plean straitéiseach seo na dúshláin sábháilteachta eagraíochtúla agus díríonn sé ar na dushláin seo a bhainistiú trí phríomhcholún, lena n-áirítear ceannaireacht agus cultúr, sócmhainní sábháilte agus ionaid oibre, bealaí sábháilte oibre, agus comhpháirtithe seachadta sábháilte, agus sláinte agus folláine. Tá cur i bhfeidhm an phlean de réir sprice agus seachadadh roinnt príomhthionscnamh i mbliana.

In 2024, athsheoladh ár gCreat ‘Obair Shábháilte, Baile Sábháilte’, a chuireann san áireamh anois ár luach nua sábháilteachta “coinnímid a chéile sábháilte”. Seoladh é seo don fhoireann go léir ag teacht le chéile na cuideachta uile leis an Príomhoifigeach Feidhmiúcháin, agus ag laethanta speisialta ‘Uisce agus Fuíolluisce’ ar fud na tíre.

Baineadh garsprioc gan fasach amach in 2024, nuair a aistríodh 31 chóras bainistíochta sábháilteachta ó na hÚdaráis Áitiúla go hUisce Éireann agus cuireadh i bhfeidhm iad ina dhiaidh sin. Agus na Córais Bhainistíochta Sábháilteachta reatha á gcur i bhfeidhm, tá Uisce Éireann tiomanta d'fhorbairt agus do rolladh amach aon chóras comhtháite bainistíochta sábháilteachta (SMS)amháin. I measc na bpríomhchodanna a seachadadh in 2024, tá forbairt ábhair a dhéanfaidh caighdeánú ar an gcur chuige maidir le sláinte agus sábháilteacht i seirbhísí uisce, soláthar uirlisí faisnéise gnó a chuirfidh ar chumas Uisce Éireann bealaí sábháilte oibre a roinnt le baill foirne túslíne, monatóireacht a dhéanamh ar chomhlíonadh náisiúnta agus teachtaireachtaí sábháilteachta a chur in iúl don fhoireann ar fud limistéir mhóra gheografacha. I measc na bpríomhthionscnamh, tá cruthú Leabhrán ‘Obair Shábháilte, Baile Sábháilte’ a bheidh éasca le húsáid don fhoireann tosaigh, mol Acmhainní Sábháilteachta, nósanna imeachta ríthábhachtacha agus treoirlínte dár bhfórsa saothair nua. Seachadadh oiliúint sábháilteachta, lena n-áirítear oiliúint bainisteoir líne don fhoireann líne tosaigh le rátaí críochnaithe 84%. Chinntigh bunú fóram áitiúil agus náisiúnta d’Ionadaithe Sábháilteachta go gcuirtear baill foirne túslíne san áireamh san aistear bainistíochta um athrú sláinte agus sábháilteachta.

Leanadh ar aghaidh le fás agus forbairt ár bhfeachtas sábháilteachta “An bhFuil Mise SÁBHÁILTE?”do chomhpháirtithe seachadta in 2024 nuair a seoladh suíomh gréasáin, chun acmhainní sábháilteachta a roinnt ar fud na gcomhpháirtithe seachadta sa tionscal uisce. Gné shainiúil den suíomh gréasáin is ea foláirimh um ghabháil mhaith (nuair a dhéanann duine rud maith chun rud olc a stopadh) agus neastimpiste a roinnt trí fhíseáin ghearra ar an láithreán. I rith na bliana, leathnaíodh “An bhFuil Mise SÁBHÁILTE?” chomh maith, chuig ár gcomhpháirtithe seachadta a bhíonn ag gabháil do Dhearadh, Tógáil agus Oibriú (DTO). D'oibríomar freisin lenár gcomhpháirtithe seachadta agus leis an Ionad Oiliúna Foirgníochta Náisiúnta chun clár oiliúna maoirseachta tosaigh a fhorbairt. Ar bhuaicphointí eile i rith na bliana, tá: seimineár gréasáin go luath sa bhliain leis an BSL agus Líonraí Gáis Éireann chun aird a tharraingt ar fheasacht ar sheachaint seirbhíse; seoladh rialacha órga maidir le bainistiú riosca criticiúil; forbraíodh riail órga maidir le seachadadh píopaí agus forbraíodh an comhoibriú lenár gcomhpháirtithe seachadta chun tacú le clár fairsing imeachtaí sábháilteachta do mhí na sábháilteachta tógála. I rith na bliana, d’oibrigh Uisce Éireann go dlúth le Lighthouse Charity chun cuairteanna suímh a éascú, chun oibrithe tógála a chur ar an eolas faoi na tacaíochtaí atá ar fáil dóibh. Ba bhuaicphointe an bhéim seo ar mheabhairshláinte agus ar fholláine in earnáil na tógála feachtas rathúil “Ag tabhairt aire don Nollaig” a reáchtáil Uisce Éireann lenár gcomhpháirtithe seachadta chun tús a chur le níos mó comhráite ar na dúshláin phearsanta atá roimh dhaoine sa tionscal, go háirithe thar thréimhse na Nollag.

I rith na bliana, reáchtáil Uisce Éireann feachtais agus tionscnaimh spriocdhírithe sláinte agus sábháilteachta chun sábháilteacht a fheabhsú go réamhghníomhach lena n-áirítear ár bhfeachtas um thiomáint gheimhridh, ag díriú ar réimsí ard-riosca ríthábhachtacha, ag obair le seirbhísí faoi thalamh, ag obair le trácht agus uirlisí beo, gléasra agus trealamh. Bhí 3,477 comhrá ann faoin sábháilteacht i rith na bliana, chun a chinntiú go ndéantar an cultúr ‘Obair Shábháilte, Baile Sábháilte’ leabú. Mar thoradh ar ár dtionscnaimh Meabhairshláinte agus Folláine, tá méadú ar líon na nGarchabhróirí Meabhairshláinte oilte (181 faoi láthair) agus spreagtar an fhoireann i gcónaí chun nósanna sláintiúla a chruthú trí thionscnaimh amhail ‘Time to Talk’ agus ár’ n-ardán folláindigiteach’. Tá roinn sláinte ceirde bunaithe againn freisin chun tacú lenár bhfórsa saothair nua le rolladh amach chlár vacsaínithe Uisce Éireann mar cheann dá gcéad tionscnaimh.

Cuimsíonn colúin Obair Shábhailte Baile Sábhailte na luachanna sábháilteachta inár ngníomhaíochtaí trí uirlisí inláimhsithe a sholáthar don fhoireann agus do chomhpháirtithe seachadta araon chun tacú leo. Tá córas bainistithe sláinte agus sábháilteachta Uisce Éireann bunaithe ar chaighdeáin aitheanta (deimhniú ISO 45001) agus tá sé deimhnithe ag páirtí seachtrach. Tá feidhm aige ar 100% dár bhfórsa saothair féin agus ar aon duine a oibríonn faoi bhainistíocht agus rialú dhíreach Uisce Éireann.

Éagsúlacht, Cothromas agus Cuimsiú

Fostaíonn Uisce Éireann beagnach 2,300 duine, a sholáthraíonn seirbhísí uisce agus fuíolluisce in éineacht le thart ar 2,200 ball foirne in Údaráis Áitiúla a oibríonn ar son Uisce Éireann. Aithnímid an tábhacht a bhaineann le comhionannas, éagsúlacht agus ionchuimsitheacht i measc ár lucht saothair.

Anois ina séú bliain, tá clár oibre ibelong Éagsúlacht, Cothromas agus Cuimsiú Uisce Éireann (ÉC&C) á rialú ag Comhairle ÉC&C Uisce Éireann, fóram trasfheidhmeach fostaithe il-leibhéil, faoi stiúir urraíocht an Fheidhmeannais é, a ceapadh in 2024. Chuir an Chomhairle um Éagsúlacht, Cothromas agus Cuimsiú obair chun cinn ar an gcéad atriall eile dár Straitéis um Éagsúlacht, Cothromas agus Cuimsiú a leagann síos an treo straitéiseach do 2024-2026. Tá Comhairle ÉC&C Uisce Éireann agus clár oibre ibelong ríthábhachtach do sheachadadh THRIVE agus sinn ag iarraidh ‘Cultúr Sábháilte, Éagsúil, Uilechuimsitheach a thabhairt le chéile, ina bhfuil ár ndaoine cumasaithe agus ardfheidhmeach’.

Tá ionadaithe na bhfostaithe ar Chomhairle ÉC&C. Reáchtálann ár gcúig ghrúpa acmhainne; atá faoi cheannaireacht na bhfostaithe; Líonra na mBan, an Líonra Cumais, an líonra Eitneachta agus Cultúir, an Líonra Teaghlaigh agus an Líonra Tuar Ceatha, go leor imeachtaí ballraíochta, cruthaítear naisc idir fostaithe agus glacann siad páirt i bplé leis an lucht bainistíochta d’fhonn Uisce Éireann níos cuimsithí a chruthú. Reáchtáladh sé imeacht is tríocha in 2024, rud a chruthaigh feasacht agus a chuir seisiúin oideachais ar fáil in Uisce Éireann.

In 2024, seoladh ár ríomh-fhoghlaim um Fheasacht Mhíchumais, arna seachadadh ag ár líonra ibelong ’Cumas’, a sholáthar tuiscint chuimsitheach ar mhíchumas do chomhghleacaithe Uisce Éireann. Leis an oiliúint solátharaítear treoir ar na dúshláin a bhaineann le dearcthaí atá as dáta maidir le míchumas agus ina ionad sin cuimsíonn sí samhail shóisialta an mhíchumais, a chuireann béim ar bhacainní a bhaint agus deiseanna cothroma a chruthú ionas go mbeidh ar chumas gach duine a bheith lán-rannpháirteach sa tsochaí.

Thug ár líonra Tuar Ceatha, le tacaíocht ó “Bród” san ionad oibre, príomhchainteanna feasachta go hinmheánach agus ghlac siad páirt in imeachtaí Bród Bhaile Átha Cliath agus na Gaillimhe in 2024. Bhí sé de phribhléid ag líonra ár mBan, agus ár bhfoirne AD, tacaíocht a thabhairt d’imeacht a d’eagraigh an charthanacht WorkEqual, ag fáiltiú roimh 60 bean atá ar a dturas i dtreo fostaíochta, agus ag soláthar sraith eispéiris chumhachtaithe dóibh chun a muinín agus a n-ionchais ghairme a mhéadú.

Ainmníodh Uisce Éireann agus tá sé sa bhabhta ceannais do ghradaim Lárionad Éagsúlachta na hÉireann 2025 sa chatagóir “Gradam Eagraíocht na Bliana san Earnáil Phoiblí” - Cuideachta Ceannais na Bliana CIPD na hÉireann um Chomhionannas, Éagsúlacht, Cothromas agus Cuimsiú. D’éirigh lenár speisialtóir um Éagsúlacht, Cothromas agus Cuimsitheacht dhá ghradam shuntasach a bhuachan do Cheannaire ag teacht aníos ÉC&C (ICFD) agus Laoch na hÉagsúlachta CIPD. Bhí ár líonra Eitneachta agus Cultúir i measc na n-iomaitheoirí sa bhabhta ceannais de chuid Éagsúlacht sa Teicneolaíocht don tionscnamh aitheantais speisialta dár mbeartas Babhtáil Saoire.

Leanann Uisce Éireann de bheith ag cloí le Cairt Éagsúlachta Éireann, Gealltanas Ardaithe de chuid Gnó sa Phobal Éireann (BITCI), Gealltanas Ionad Oibre Uilechuimsitheach agus comhoibríonn sé le taighde ardáin UK Water Industry Research (UKWIR) agus sonraí ar dhéimeagrafaic an lucht saothair i bhfóntas uisce sa RA agus in Éirinn.

Tomhaiseann Innéacs ÉC&C meon na bhfostaithe maidir le cuimsiú agus tuairiscítear go bliantúil mar chuid de rannpháirtíocht fostaithe. Is ionann an scór do 2024 agus 86%, figiúr atá 4% os cionn mheán náisiúnta na hÉireann, de réir an tagarmhairc ó sholáthraí shuirbhé rannpháirtíochta fostaithe Uisce Éireann.

An Bhearna Phá idir na hInscní

Is gné thábhachtach de chlár oibre ÉC&C Uisce Éireann aghaidh a thabhairt ar ár mBearna Phá idir na hInscní, agus sinn ag iarraidh ionadaíocht na mban a mhéadú ag gach leibhéal agus a chinntiú go bhfuil timpeallacht á cruthú againn ina mothaíonn gach duine go bhfuil meas orthu agus aitheantas á thabhairt dóibh san obair.

Is ionann an bhearna phá idir na hinscní agus an difríocht idir meánphá na bhfear agus na mban in aghaidh na huaire ar fud na heagraíochta. D’fhoilsigh Uisce Éireann a thríú tuarascáil ar an mBearna Phá idir na hInscní an 13 Nollaig 2024 don tréimhse pá 27 Meitheamh 2023 go 26 Meitheamh 2024. Tugann an tuarascáil seo léargas dúinn ar réimsí ina gcaithfimid ár n-iarrachtaí a dhíriú chomh maith le léiriú a thabhairt ar ár dtiomantas leanúnach do thrédhearcacht agus feabhas a dhéanamh ar chomhionannas inscne san eagraíocht. Thuairiscíomar meánbhearna phá idir na hinscní de 2.31%, rud a chiallaíonn go dtuilleann fir ar an meán 2.31% níos mó ná mná, bunaithe ar gach leibhéal eagraíochtúil. Léiríonn an figiúr seo an pointe ama ina bhfuilimid inár dturas chun seirbhísí uisce in Éirinn a athrú ó bhonn. Le linn na tréimhse seo, tháinig fás suntasach ar ár bhfórsa saothair agus ar phróifíl athraitheach fostaithe.

Ina theannta sin, táimid bródúil as tionscnaimh a thacaíonn le comhionannas inscne agus le dul chun cinn gairmréime na mban a fheiceáil ag teacht chun cinn. Measaimid gurb í an tréimhse idir anois agus deireadh na bliana 2026 a bheidh ina húdar luaineachtaí inár mbearna phá idir na hinscní bliain ar bhliain. Tá an obair atá á déanamh againn chun aghaidh a thabhairt ar ár mBearna Phá idir na hInscní riachtanach chun ár gclár oibre ÉC&C a chur chun cinn, chun ionadaíocht ban a mhéadú ag gach leibhéal agus chun a chinntiú go bhfuil timpeallacht á cruthú againn ina mothaíonn gach duine go bhfuil meas orthu agus go bhfuil aitheantas a thabhairt dóibh ag an obair. Tá an tuarascáil seo foilsithe ar ár suíomh Gréasáin agus cuimsítear ann sonraí ar na príomhthosca agus ár bplean gníomhaíochta.

Clár Iarchéime

In 2024, bhí próifíl níos fearr againn maidir le buanna ban ar an gclár iarchéime go dtí 52% in 2024 agus is mic léinn idirnáisiúnta 45% den líon daoine a ghlacamar isteach. Ina theannta sin, i mbliana bhí ár gcéad Intéirneacht Samhraidh ETIM againn áit a raibh 50% baineannaigh againn laistigh de réimsí ETIM den ghnó. Choinnigh Uisce Éireann an rangú céanna Gradireland in 2024 agus an bhliain roimhe sin, ag an 46ú fostóir céimithe is tarraingtí in Éirinn.

Cearta Daonna

In Uisce Éireann, táimid ag cur le meas ar chearta daonna isteach inár bhfís eagraíochtúil d’Éirinn inbhuanaithe ina bhfuil meas agus cosaint ar uisce, don phláinéid agus don saol ar fad a thacaíonn sé. Tá polasaí ar fáil ar ár suíomh gréasáin www.water.ie.

Rialachas

Iompar Gnó

Déan tagairt le do thoil do Thuarascáil an Bhoird le haghaidh tuilleadh faisnéise maidir le:

Nochtuithe cosanta.
Cód Iompair Gnó.
Beartas frithbhreabaireachta agus frith-éillithe.
Beartas frith-chalaoise.
Brústocaireacht a Rialáil.
Beartas íocaíochta pras.

Oibrí teicniúil i suíomh monatóireachta oifige le go leor scáileán ina radharc agus scáileán balla mór sa chúlra.

Comhar

Geilleagar Ciorclach

Tá tionscnaimh á gcur chun cinn againn a ghlacann múnla geilleagair chiorclaigh chun ár sloda a bhainistiú mar go soláthraíonn siad foinse inbhuanaithe d’ábhar críochta luachmhar, ag soláthar comhlánú eile ar na hamhábhair atá in úsáid faoi láthair.

Cuimsíonn sloda uisce iarmhar alúmanaim ón bpróiseas cóireála chun orgánacha a bhaint as an bhfoinse uisce amh. Go traidisiúnta, chuir sé seo teorainn le húsáid sloda, agus is minic a bhíonn diúscairt chuig líonadh talún mar thoradh air. Le blianta beaga anuas, tá imscrúdú gníomhach déanta againn ar roghanna eile agus anois cuirimid an sloda seo lena úsáid i dtáirgeadh stroighne agus míntíriú talún. In 2024, d’éirigh linn thart ar 95% dár sloda uisce a chur chuig asraonta geilleagair chiorclaigh.

Maidir le sloda fuíolluisce, réitíonn ár saoráid nuálaíoch aisghabhála fosfair (P-aisghabháil) dúshláin bhainistithe cothaitheach trí fhosfar agus nítrigin (mar amóinia) a aisghabháil ó shruthanna bardasacha mar dheascán fosfáit amóiniam maignéisiam (strúivít). Athraíonn sé seo na cothaithigh seo go táirge leasacháin inbhuanaithe.

Nuálaíocht

I rith na bliana 2024, lean an fhoireann um Chaighdeáin agus Sonraíochtaí Nuála ar aghaidh de bheith ag díriú ar an dul chun cinn i dtreo ár spriocanna inbhuanaitheachta, ag obair ar thionscadail lena n-áirítear feabhsú na Líonraí Uisce agus Sonraíocht Fheidhmeach Cóireála Fuíolluisce. Tugann na doiciméid seo breac-chuntas ar na riachtanais dearaidh ardleibhéil agus sócmhainn á dhearadh mar chóras thar shaolré na sócmhainne a thugann san áireamh ionchuir saolré, fealsúnacht dearaidh agus uirlisí chun inbhuanaitheacht, costas agus feidhmíocht a bharrfheabhsú go hiomlánaíoch. In 2024, cuireadh tionscadal ar “Réitigh Innealtóireachta Dúlra do Chóireáil Fuíolluisce” (NBS) le chéile le cabhair de €1.26 milliún ó Chiste Nuálaíochta na Seirbhísí Uisce. Chomh maith leis sin, d'fhorbair an fhoireann comhpháirtíocht straitéiseach le BSL chun iniúchadh a dhéanamh ar ról athúsáid fuíolluisce i dtáirgeadh Hidrigine, lena n-áirítear sineirgí geilleagair chiorclaigh lenár n-oibríochtaí.

3 innealtóir i mbun comhrá ag suíomh oibreacha lasmuigh agus athbhreithniú á dhéanamh acu ar líníochtaí teicniúla.

Tuarascáil maidir le hInbhuanaitheacht

Réamhrá

Straitéis Inbhuanaitheachta

Gnó ag Obair go Freagrach

Comhshaol

Athrú Aeráide

Oiriúnú Aeráide

Glan-Nialasacht

Astuithe Gáis Cheaptha Teasa (GCT).

Scóip Astaíochta GCT 1, 2, 3

Fuinneamh agus Éifeachtúlacht Fuinnimh

Fuinneamh In-athnuaite

Uisce

An Bhithéagsúlacht

Cás-Staidéar

Sóisialta

Ár nDaoine

Tús Áite á Tabhairt don tSábháilteacht

Tá Uisce Éireann tiomanta do chultúr na sábháilteachta a fheabhsú tríd an gcreat agus tionscnaimh Obair Shábháilte Baile Sábháilte, a dearadh chun a chinntiú go bhfuil an chumhacht ag an bhfoireann agus ag comhpháirtithe seachadta tosaíocht a thabhairt do bhealaí sábháilte oibre.

Éagsúlacht, Cothromas agus Cuimsiú

An Bhearna Phá idir na hInscní

Clár Iarchéime

Cearta Daonna

Rialachas

Iompar Gnó

Comhar

Geilleagar Ciorclach

Nuálaíocht